Samsung shet 600 mijë Galaxy Tab

Samsung ka njoftuar se ka arritur të shesë më shumë se 600 mijë kompjuterë tablet - Galaxy Tab, në mbarë botën, prej momentin kur kompania i ka hedhur në shitje, përafërsisht para një muaji.
Këto shifra të shitjes, e bëjnë tabletin e Samsung-ut, tabletin më të famshëm Android në botë deri më sot.

Prodhuesi i njohur i pajisjeve elektronike – Samsung, gjithashtu ka thënë se ka shitur më shumë se 30 mijë tablet në tregun korean, që në javën e parë të lansimit të kësaj pajisje në treg, mirëpo në anën tjetër rivali Apple ka paralajmëruar se do të fillojë shitjen e tabletit të saj në tregun korean, ndërsa sipas përfaqësuesve të kësaj kompanie thuhet se Apple ka pranuar më shumë se 40 mijë para-porosi për tabletin e saj, pikërisht në këtë treg.

Megjithatë, mund të thuhet se Samsung Galaxy Tab ka pasur sukses, mirëpo prodhuesi i këtij tableti duhet të bëjë edhe më shumë, nëse dëshiron që të arrijë majat e suksesit, siç ka arritur Apple me tabletin – iPad.