Dënohet vrasja e Salkovicit dhe plagosja e Islamovicit

Këshilli për Mbrojtjen e të Drejtave e të Lirive të Njeriut dënoi ashpër vrasjen e Shefko Salkovicit dhe plagosjen e Edin Islamovicit, duke vlerësuar se kjo vrasje është një sulm që ka për qëllim përhapjen e frikës për të gjithë ata që tentojnë të bëhen pjesë e procesit të integrimit të veriut në institucionet e Kosovës.
KMDLNJ thekson se ky rast tregon se sa serioze është situata e sigurisë në atë pjesë të Kosovës dhe sa është e rrezikuar jeta e qytetarëve atje nga strukturat kriminale.

“Ky rast ka ndodhur pikërisht në ditën kur strukturat paralele serbe kanë filluar fushatën kundër marrjes pjesë të serbëve në zgjedhjet e Kosovës. KMDLNJ kërkon nga organet përgjegjëse që të ndërmarrin masat e nevojshme për identifikimin e autorëve të krimit dhe vënien e tyre para drejtësisë”, thuhet në reagimin e KMDLNJ-së.

Këshilli po ashtu kërkoi me ngulm që institucionet e Kosovës të zbardhin rastin e vrasjes dhe plagosjes, në të njëjtën kohë së bashku me EULEX dhe KFOR duhet të marrin masa për të mbrojtur jetët e qytetarëve të kësaj pjesë të Kosovës.

Moszbardhja e këtij rasti dhe rasteve të tjera është një sinjal i keq për sigurinë dhe rendin në Kosovë, ndërkaq krimet e pandriçuara në pjesën veriore kanë krijuar një oazë për kriminelët dhe strukturat kriminale atje.

Ndryshe, të mërkurën në një pritë të organizuar në fshatin Postenje të Leposaviqit është vrarë Shefko Salkovic dhe është plagosur rëndë Edin Islamovic.

Salkovic dhe Isamovic kanë punuar për Komisioni Qendror Zgjedhor të Kosovës.