Atalanta interesohet për Bogdanin

Krerët e skuadrës së Atalantas kanë shprehur interesim për shërbimet e sulmuesit shqiptar të Cesenas, Erjon Bogdani, shkruajnë të dielën mediumet italiane. Atalanta bën gara në Serie B dhe në edicionin e ardhshëm synon rikthimin në Serie A. Krerët e kësaj skuadre dëshirojnë të transferojnë Bogdanin 33-vjeçar gjatë këtij miniafati kalimtar. Sulmuesi i Kombëtares së Shqipërisë ka kontratë me Cesenan deri në fund të këtij edicioni dhe aktualisht është golashënuesi më i mirë i ekipit me katër gola të shënuar në Serie A. Atalanta zë vendin e dytë në Serie B, kurse pjesë e kësaj skuadre është edhe mesfushori kosovar, Migjen Basha.