Shpërblimet ngutin çeket të lindin deri në mesnatë

Pragë, 31 dhjetor – Çeket të cilat janë afër lindjes së fëmijëve të tyre po nguten që këtë ta bëjnë deri në mesnatë dhe madje po tentojnë të mashtrojnë mjekët, pasi nga hyrja në vitin 2011 të drejtën e fitimit të kompensimit prej 520 eurove për lindje të fëmijës do ta gëzojnë vetëm familjet e varfra.
“Çdo ditë në lindore paraqiten një apo edhe dy shtatzëna që kërkojnë të lindin. Pohojnë se kanë kontraktime apo se janë fare gati pranë lindjes. Por, pastaj del se kjo nuk është e vërtetë”, tha një mjek i repartit të akusherisë në qytetin Ostrava.
Me synimin dhe dëshirën për të nxitur rritjen e natalitetit, Çekia ka dhënë deri tash një shtesë të posaçme prej 520 eurove secilës grua që ka lindur, mirëpo, për arsye të kursimeve në të gjithë sektorët, prej sonte në mesnatë kjo shtesë do t’i jepet vetëm grave nga familjet e varfra, përkatësisht që brenda muajit nuk marrin të ardhura më të mëdha mujore se 680 euro.
Në të ardhmen, shtesa për lindje do të paguhet vetëm për fëmijën e parë.