Rreth një mijë zogj të ngordhur bien nga qielli në SHBA

Arkansas, 2 janar – Shërbimet kompetente të shtetit amerikan Arkansas po vazhdojnë të hetojnë shkaqet, të cilat kanë bërë që rreth një mijë zogj të pajetë të bien nga qielli në qytetin Bib gjatë natës së Vitit të Ri.
Lajmërimet për zogjtë e ngordhur që kanë rënë nga qielli në një diametër rreth 2 km, Inspektorati për gjueti dhe peshkim i këtij qyteti, ka filluar t’i pranojë të premten para mesnatës sipas kohës lokale.
Ornitologu Karen Row ka theksuar të shtunën se në trupat e zogjve janë të dukshme lëndimet fizike dhe supozohet se “tufa është goditur nga rrufeja apo breshëri”.
Inspektorati ka kumtuar se një nga shkaqet e mundshme të këtyre zogjve mund të jenë edhe fishekzjarrët e përdorura gjatë festimit të Vitit të Ri, për shkak të të cilave ka mundësi që zogjtë të kenë ikur nga çerdhet e tyre dhe të kenë ngordhur gjatë reagimit të fortë fiziologjik në zhurmën dhe dritën e fishekzjarrëve.
Ornitologja ka theksuar se dukuritë e ngjashme kanë ndodhur edhe në vende të tjera, por analizat nuk kanë dhënë shpjegime të plota.