Ferizaj: Pesë të arrestuar për krim të organizuar

Policia e Kosovës ka arrestuar të enjten në Ferizaj pesë persona të dyshuar për krim të organizuar, shantazh dhe detyrim. Drejtoria Kundër Krimit të Organizuar, muaj më herët, kishte filluar procedurën hetimore ndaj një grupi personash të dyshuar për krim të organizuar, vrasje në tentativë, shantazh dhe detyrim.
Me urdhëresë të Gjykatës së Qarkut në Prishtinë, të enjten është realizuar kontrolli në pesë lokacione të ndryshme në Ferizaj. Sipas një komunikate për shtyp, ky kontroll kishte për qëllim arrestimin e personave të dyshuar si dhe konfiskimin e sendeve që do të mund të përdoren si dëshmi gjatë procedurës penale të mëtutjeshme.

Operacioni policor, i koduar me emrin "Apaçi", ka nisur në orët e hershme të mëngjesit nga Drejtoria Kundër Krimit të Organizuar, e cila është përkrahur edhe nga Njësiti Special Intervenues, Njësiti Special Operativ, Forensika e teknologjisë informative etj.

Me këtë rast janë gjetur dhe konfiskuar: një granatë dore; një revole; një pushkë gjuetie e kalibrit 12 mm; dy predha; tre karikatorë të revoles; një sasi municioni; mjete komunikuese (radiolidhje etj), maska; dylbi për pushkë të gjatë; pajisje kompjuteri; thika ushtarake (5 copë); dy vetura; katër telefona; dokumente të ndryshme etj. Policia për veprat penale të cekura më lart ka arrestuar pesë të dyshuar, që të gjithë shtetas të Republikës së Kosovës: Genc S., Fatmir G., Sefedin K., Hysen K. dhe Imer H. Personave të arrestuar u është caktuar fillimisht masa e ndalimit