Leonardo nis me fitore, pret shumë nga Interi

Milano, 8 janar - Trajneri brazilian, Leonardo ka debutuar me fitore me skuadrën e tij të re Interin e Milanos. Interi të enjten mbrëma në "Giuseppe Meazza" ka triumfuar përballë Napolit me rezultatin 3:1, në ndeshjen e vlefshme për javën e 18-të të Serie A të Italisë. Mesfushori brazilian Thiago Motta realizoi dy gola, ndërsa një e shënoi argjentinasi Esteban Cambiasso. Për Napolin golin e vetëm e shënoi Michele Pazienza.
Leonardo detyrën e trajnerit në Inter e mori disa ditë më parë, duke e zëvendësuar spanjollin Rafael Benitez.
"Etja e këtyre lojtarëve ka qenë për çdo lëvdatë. Kjo fitore ka qenë plotësisht meritë e etjes së futbollistëve. Të gjithë lojtarët kanë qenë në dispozicion menjëherë si kam ardhur. Unë kam qenë i prekur nga ky përkushtim i tyre dhe nga shpirti dhe sakrifica në stërvitje. Është e pabesueshme" ka thënë Leonardo, përcjellin mediumet italiane.
"Rafael Benitez ka bërë punë të mirë në çdo klub që ka punuar, por nganjëherë gjërat nuk ecin. Skuadra duhet të mbajë atë shpirt që kishte kur fitoi çdo gjë në vitin 2010 dhe pati kënaqësi duke luajtur futboll. Ardhja ime këtu ka qenë shumë e shpejtë, por nuk dua të analizoj gjërat. Ngjitja në krye të tabelës nuk do të jetë e lehtë, mirëpo duhet shkuar ndeshje pas ndeshjeje. Këta lojtarë munden edhe më mirë".
Interi me këtë fitore është ngritur në pozitën e shtatë në tabelë me 26 pikë nga 16 ndeshje. Milani kryeson me 39 pikë nga 18 ndeshje.
Presidenti i Interit, Massimo Moratti, është ndarë i kënaqur me debutimin e Leonardos.
"Ka shkuar shumë mirë. Nuk dua të jap ndonjë notë për këtë ndeshje, por mendoj se ka ecur mirë. Skuadra ka treguar shpirt", ka thënë Moratti.
Leonardo stinorin e kaluar ishte trajner i Milanit. Në këtë skuadër kaloi plot 13 stinorë, duke kryer detyra të ndryshme. Emërimi i tij si trajner i rivalit të qytetit shkaktoi pakënaqësi te tifozët "rossonerë" dhe krerët e Milanit.