Vetëvendosje: “ Vëzhguesit tanë pengohen në Skenderaj”

Prishtinë, 9 janar - Lëvizja Vetëvendosje!, nëpërmjet një komunikate bën të ditur se ka hasur në probleme që në mëngjes në qendrën e votimit 2124b, në shkollën fillore “Abedin Rexha” në Kopiliq të Ulët, komuna e Skenderajt. Vëzhguesit e Lëvizjes Vetëvendosje! nuk janë lejuar të hyjnë brenda me arsyetim se janë nga komuna të tjera e jo nga ajo e Skenderajt. Gjatë kësaj kohe, sipas komunikatës, disa vetura të militantëve të PDK-së janë endur atypari, duke i kërcënuar vëzhguesit e Lëvizjes Vetëvendosje!
Sipas Vetëvendosjes kjo ka ndodhur në orën 08:46, ndërsa veturat me militantë kanë qenë: Golf 2 i kuq, me targa 472 KS 001, Golf 2 i zi, me targa 116 KS 998, Furgon i tipit VW 4 me targa 424 KS 391, Golf 2 i bardhe, me tabela 581 KSs 109, VW (Wolks wagen) Polo, ngjyre vjollce, me targa 295 KS 391, xhipat: me tabela te huaja LA 04 126 dhe tjetri me xhama te zinj me targa 590 KS 813. Gjatë përpjekjes për të hyrë brenda vëzhguesit tanë kanë vërejtur se kutitë kanë qenë gjysëm të mbushura, si dhe mungonte spreji dhe llampat ultra vjollcë.
Sipas Vetëvendosjes, polici Hajriz Idrizi, me numër 4409, i cili nuk i ka lejuar vëzhguesit të hyjnë, ka thënë se nuk mund te “bëj asgjë pa marrë urdhër nga komisioneri kryesor”. I pranishëm ishte edhe polici me numer 8323. Gjithashtu është kontaktuar polici i EULEX-it me numër 01818, i cili është njoftuar për ndodhinë. Ai ka thënë se është aty vetëm për mbikëqyrje ndaj policëve të Policisë së Kosovës.