Skenderaj: 12 të akuzuar për keqpërdorime në zgjedhje

Gjykata Komunale në Skenderaj ka pranuar 8 lëndë për 12 persona
të akuzuar për keqpërdorim të votave në zgjedhjet e parakohshme
parlamentare të dhjetorit të viti të kaluar. Sipas Isa Shalës, kryetar i
Gjykatës Komunale në Skenderaj, është punuar me procedurë të
përshpejtuar dhe brenda muajit janë caktuar seancat për shqyrtim të
lëndëve.Sipas tij, një lëndë ka përfunduar, një person është
shpallur fajtor dhe është dënuar me gjobë prej 500 euro, të cilën edhe e
ka paguar, njofton Zëri.
“Lëndët tjera janë në procedurë, për katër prej tyre është konfirmuar
aktakuza dhe pritet të caktohen shqyrtimet kryesore, ndërsa për tri
raste të tjera, seancat për shqyrtim të tyre janë shtyrë”, tha Shala,
duke precizuar se në një rast seanca është shtyrë për shkak se i
akuzuari ndodhet jashtë vendit, ndërsa në dy raste të tjera duhet të
ftohen dëshmitarë të rinj.
Në interesim e gazetës për përkatësinë partiake të personave të
akuzuar për keqpërdorim të procesit zgjedhor, kryetari Shala nuk e ka
treguar përkatësinë partiake të asnjërit prej tyre, ndonëse merret vesh,
se të gjithë ata i përkasin subjektit më të madh politik, PDK-së.
/Telegrafi/