Lunacek: Zgjedhje të reja në 2011

Prishtinë, 11 janar - Propozimi ka ardhur nga shefja e vëzhguesve të Parlamentit Evropian në zgjedhjet e fundit në Kosovë, eurodeputetja Ulrike Lunacek. Ajo u shfaq e zhgënjyer të hënën për procesin e votimit në komunat e Skenderajt dhe Drenasit, ku madje tha se “ka parë nga afër manipulimin e zgjedhjeve”.
Kritikat e saj kanë ardhur edhe të martën. Ajo i ka thënë RTK-së se organizimi i zgjedhjeve të reja në fund të vitit, propozim ky i disa partive, duhet të merret parasysh seriozisht.
“Kosova është me një zonë zgjedhore. Ka shumë mangësi sistemi, prandaj duhet të fillojnë shpejt përgatitjet, qoftë infrastruktura ligjore dhe të mbahen zgjedhjet deri në fund të vitit. Propozim ky i disa partive politike”, ka thënë Lunacek.
Para kësaj, ka shtuar ajo, duhet të formohen institucionet e reja. Lunacek pritet të raportoj edhe në Parlamentin Evropian për zgjedhjet e fundit, raportim ky që pritet të jetë negativ marr parasysh dëshpërimin që shfaqi këtyre ditëve me nivelin e organizimit të zgjedhjeve.
Zyra Civile Ndërkombëtare nuk ka preferuar të flasë për ndonjë opsion, por ka sugjeruar të merren seriozisht qëndrimet e Parlamentit Evropian.