Lunacek nuk do të jetë ambasadore e BE-së në Kosovë

Eurodeputetja Ulrike Lunacek nuk do të jetë përfaqësuese e
zgjedhur e Bashkimit Evropian në Kosovë. Arsyeja është formale. Ajo nuk
është diplomate e karrierës, ndërsa poste të tilla si ky në Prishtinë,
mund të udhëhiqen vetëm nga diplomatë që punojnë në shërbimin e punëve
të jashtme. Kështu, sipas RTK-së, shkruan sot gazeta
austriake Die Presse. Lunacek i ka thënë gazetës vjeneze Die Presse se
shpresat e saj ishin thyer nga përfaqësuesit e zyrës së zonjës Ashton,
pikërisht për këtë arsye formale.
Rregullat e BE-së parashikojnë që personi i cili do të marrë postin e
përfaqësuesit të BE duhet të jetë diplomat i vendit nga vjen ose
funksionar i Komisionit Evropian. Luancek, 54 vjeçare, e cila është
deputete e të gjelbërve në Parlamentin Evropian, gjatë karrierës së saj
politike nuk ka qenë asnjëherë diplomate, pasi më parë ka qenë aktiviste
e disa organizatave joqeveritare.
Luancek në deklaratën e saj për gazetën Die Presse, që botohet në
numrin e sotëm, kritikon zonjën Ashton, e cila, siç thotë, vetë e kishte
joshur të konkurronte për këtë post, kurse tani e refuzon kandidaturën
për arsye formale.
“Jam shumë e irrituar me zonjën Ashton, e cila ka vendosur këtë kusht
tejet formal” citohet Lunacek në gazetën vjeneze die Presse.
/Telegrafi/