Lunacek: Kosova nuk do të ndahet

“Kosova nuk do të ndahet dhe pikë”. Kështu ka deklaruar
raportuesja për Kosovën në Parlamentin Evropian, Ulrike Lunacek. Ajo
përmes kësaj deklarate dhënë Radio Dukagjinit i përgjigjet zërave të
zyrtarëve serb që përmendin ndarjen e Kosovës si zgjidhje të problemit
mes Kosovës dhe Serbisë. Ajo po ashtu ka thënë se brenda një
periudhe të shkurt kohore, Kosovës mund t’i dorëzohet udhërrëfyesi për
liberalizim të vizave.
Disa politikanë në Serbi janë duke e proklamuar idenë e ndarjes, por
kjo ide nuk ka të bëjë asgjë me temat që janë në tavolinë, ka thënë mes
të tjerash eurodeputetja Lunacek. Sipas saj kjo ide nuk do të jetësohet
dhe as që mbështetet nga Parlamenti Evropian dhe ata që janë të
angazhuar në dialog nga Bashkimi Evropian.
“Në emër të Kosovës, ata që përfaqësojnë këtë shtet, zonjës Tahiri
dhe të tjerëve poashtu dhe opinionit publick, fokusi duhet të jetë nga
të mirat që do të vjelën nga këto bisedime ku do të ketë përmirësim për
jetën e qytetarëve por edhe në rrugën drejt bashkimit evropian. Ndarja e
Kosovës nuk është në tavolinë dhe pikë”, ka thënë Lunacek.
Raportuesja për Kosovën në Parlamentin Evropian, Ulrike Lunacek ka
folur edhe për procesin e liberalizimit të vizave. Ajo ka theksuar se
beson që do të ketë progres në të ardhmen e afërt në këtë fushë, në
mënyrë që edhe kosovarët të mund të udhëtojnë lirshëm, pa viza.
“Shpresoj shumë që do të shënohet progres, dhe siç e thash edhe më
parë nga këndvështrimi i Parlamentit Evropian ne që po përpiqemi me të
gjitha forcat për këtë proces besojmë që dialogu për vizat do të fillojë
sa më shpejtë që është e mundur, shumë shpejt. Kjo është ajo çfarë ne
duam dhe ajo për të cilën jemi duke punuar”, është shprehur
eurodeputetja.
Ulrike Lunacek është pjesë e delegacionit të Parlamentit Evropian që është duke qëndruar në Kosovë. /Telegrafi/