Zbulohet vaksina kundër kokainës?

Hulumtuesit e Fakultetit të Mjekësisë në New York, WCMC (Weill Cornell Medical College, kanë arritur të zhvillojnë vaksinën kundër kokainës, kanë njoftuar mediet franceze.
Fjala është për modifikimin e virusit të gripit, i fokusuar në prodhimin e kompozimeve shumë të ngjashme me kokainën.
Gjatë testeve të kryera në minj, injektimi i këtyre viruseve të modifikuar në formë të vaksinës, ka ndikuar te ata në prodhimin e antitrupave kundër kokainës.
Te minjtë ka pasur reagime të shpejta imunulogjike në antitrupat që shkatërrojnë kokainën në gjak, pa depërtuar deri në tru. Kështu që thithja e kokainës nuk kishte më efekt.
Tani, megjithatë, duhet të kryhen analizat te njeriu, por shkencëtarët duket se janë në rrugë të mirë, sugjerojnë mediet.