“Topi i Artë” zhgënjeu mediet spanjolle

Madrid, 11 janar - Pa kaluar 24 orë të plota prej nga Lionel Messi, për herë të dytë radhazi e fitoi shpërblimin prestigjioz “Topi i Artë”, zhgënjimi i ka kapluar mediet spanjolle.
“Messi lë Spanjën pa ‘Topin e Artë’”, është titulli i gazetës sportive “Marca”. Argentinasi pengoi marrjen e këtij trofeu për herë të dytë nga një spanjoll, pasi Luis Suarez mbetet i vetëm dhe pa pasardhës.
“Messi është Topi i Artë”, titullon lajmin në faqen e saj gazeta tjetër sportive “AS” e cila në shkrimin e saj nuk e fsheh habinë për fituesin e këtij edicioni.
Pasi ka kujtuar se në 2010 argjentinasi fitoi La Liga dhe Superkupën spanjolle, “AS” shkruan se nuk ishte nevoja të qarkullonin me muaj të tërë fjalë se fituesi do të jetë Iniesta apo Xavi, pasi kanë qenë 154 gazetarët sportiv, 208 trajner dhe po aq kapitenë të kombëtareve të ndryshme që kanë votuar argjentinasin përpara shokëve të skuadrës Iniesta - Xavi”.
Nga ana tjetër gazeta e përafërt me klubin katalunas ”El Mundo Deportivo” nuk ka bërë asnjë koment më shumë. “Messi është lojtari i 8 i Barcës që fiton “Topin e Artë”.