Të hetuarit të tërhiqen vetë

Anëtari i Kryesisë së PDK-së Ramë Buja, pajtohet plotësisht me deklaratën ambasadorit amerikan Christopher Dell dhe shefit të ICO-së, Piter Feith, që vendi duhet të qeveriset nga njerëz me “duar të pastra”.

“Realisht atë që kërkon ambasadori ka shumë të drejtë dhe duhet të jetë kështu. Por, pyetja se a do ta ketë të vështirë PDK-ja të realizoi një qeveri të tillë, gjithsesi që do ta ketë të vështirë por jo të pa mundur”, ka thënë Buja për Zëri.

Ai u a kujton atyre se ndërtimi i shtetit është më i rëndësishëm se sa individi.

“Unë konsideroj se ata persona janë shumë të ndërgjegjshëm dhe e kuptojnë peshën e rëndësisë së tyre, por edhe peshën e veprimit politik që duhet bërë. Andaj, besoj se kjo do të jetë diçka që do të mund të tejkalohet, jo pa telashe por do të tejkalohet”, ka thënë Buja.

Ambasadori amerikan Christopher Dell ditë më parë, në një intervistë për Kohën Ditore ka thënë se të gjithë ata zyrtarë që janë dënuar ndonjë herë nga ndonjë gjykatë, që kanë ndonjë aktakuzë ose që kanë përjetuar ndonjë aksion të EULEX-it, si bastisje ose marrje në pyetje, nuk duhet të jenë pjesë e qeverisë së re.

Ndryshe, sipas publikimi të një liste të PDK-së nëpër media, Buja nuk ka marr votat e duhura për të qenë deputet në përbërjen e ardhshme të Kuvendit.