Buhler vlerëson punën e ushtarëve të Shqipërisë

Komandanti i KFOR-it, Erhald Buhler, në vazhdën e udhëtimit të tij nëpër Ballkanin Juglindor ka pasur edhe një vizitë të shkurtë zyrtare në Shqipëri. Me këtë rast u theksua nevoja e forcimit të mëtutjeshëm të bashkëpunimit dhe marrëdhënieve në të mirë të sigurisë, stabilitetit dhe prosperitetit në rajon e më gjerë.

Gjatë vizitës Buhler u takua me shefin e Shtabit të Përgjithshëm të Forcave të Armatosura Shqiptare, Gjeneral Majorin Maksim Malaj si dhe përfaqësuesit më të lartë të shtabit të përgjithshëm.

Në njoftimin e KFOR-it thuhet se Buhler njoftoi mbi sfidat dhe çështjet e KFOR-it për të vazhduar misionin dhe në të njëjtën kohë të përmbush detyrën e “Reduktimit të forcave të KFOR-it dhe transferin gradual të kompetencave tek institucionet e Kosovës veçanërisht tek Policia e Kosovës”.

Ai vlerësoi se KFOR-i me numër të reduktuar të ushtarëve dhe me dy Grupe Shumëkombëshe Luftarake nën komandën direkte të tij dhe me një fleksibilitet të shtuar, lëvizshmëri dhe gatishmëri, do të jetë në gjendje t’i kryejë detyrat që i takojnë.

Gjenerali Buhler vlerësoi situatën në kufi në mes të Shqipërisë dhe Kosovës. Ai tha se dorëzimi i autoritetit nga KFOR-i tek Policia Kufitare ishte i suksesshëm dhe se bashkëpunimi në mes të Forcës së Policisë shqiptare dhe asaj kosovare është i suksesshëm.

Shefi i Shtabit të Përgjithshëm i Forcave të Armatosura Shqiptare, Gjeneral Major
Maksim Malaj, prezantoi reformat të ndërmarra në Forcat e Armatosura Shqiptare
dhe angazhimin e këtyre forcave në misione jashtë Shqipërisë, në Afganistan, Bosnjë dhe Hercegovinë, Kosovë, etj.

Ndërkaq, Buhler lavdëroi kontributin e fuqishëm dhe kompetent të ushtarëve shqiptar në KFOR. “Ata bëjnë një punë të shkëlqyer dhe na ndihmojnë shumë për të përmbushur detyrat tona. Pjesëtarët e Forcave të Armatosura Shqiptare janë shumë profesional dhe miq të mirë në komunitetin ndërkombëtar të ushtarëve të KFOR-it dhe NATO-s”, tha ai.

Gjeneralët theksuan nevojën e forcimit të mëtutjeshëm të bashkëpunimit dhe marrëdhënieve në të mirë të sigurisë, stabilitetit dhe prosperitetit në rajon e më gjerë.