Feith kërkon që Thaçi t’i lë jashtë qeverisë njerëzit nën hetime

Prishtinë, 23 janar - Përfaqësuesit e bashkësisë ndërkombëtare në Kosovë kanë përforcuar qëndrimin e tyre për të mos përfshirjen në përbërjen e re të qeverisë personat e dënuar më parë nga gjykatat e as personat që aktualisht janë nën hetime.
Pas ambasadorit amerikan Christofer Dell, është Përfaqësuesi Civil Ndërkombëtar në Kosovë, Pieter Feith, ai i cili kërkon haptas nga Thaçi që të lë jashtë qeverisë njerëzit e partisë së tij, ndaj të cilëve po zhvillohen hetime.
Në një intervistë për Alsat, Feith tha se do ta kishte shumë të vështirë që të zhvillojë raporte me njerëzit që janë nën hetime, në rast se ata përfshihen në qeverinë e re, për çka ai tha se e ka njoftuar edhe Thaçin.
“Ajo çka më siguri do të ndihmonte në ketë drejtim është që qeveria të përbëhet nga njerëzit që kanë nivelet më të larta të udhëheqjes etike dhe qeverisjes politike. Me fjalë të tjera, ajo çka kërkohet janë njerëz që janë të pastër, që nuk janë të akuzuar, që nuk janë nën hetime, njerëz që kanë aftësi dhe kompetenca teknike për tu marrë me çështjet me të cilat ballafaqohet Kosova, njerëz të cilët e kanë besimin e qytetarëve të Kosovës dhe që gëzojnë besueshmëri edhe jashtë Kosovës. Pra, një qeveri e klasës së parë dhe me nivel të lartë etik e politik do të ishte e rëndësishme për të garantuar kredibilitetin dhe legjitimitetin që duam ta kemi”, tha Feith.
Kreu i ICO-s tha se nuk sheh asnjë arsye për zgjedhje të reja, siç po kërkojnë disa forca politike. “Jo, nuk mendoj se do të ishte zgjidhje, sepse Kushtetuta dhe ligjet janë shumë të qarta. Ato thonë se qeveria e re duhet të jetë në gjendje të përmbushë mandatin katërvjeçar. Përveç nëse e humbet besimin e parlamentit. Kështu që unë nuk shoh ndonjë nevojë të veçantë për të devijuar nga kjo. Duhet të ketë stabilitet dhe, nëse qeveria do të ketë besimin e shumicës në Kuvend, ajo do të jetë në gjendje të përmbushë ketë mandat”, vlerësoi Feith.