Wolverhampton i gatshëm të japë 6 milionë euro për Canën

Londër, 26 janar - Skuadra angleze Wolverhampton ka shprehur interesim për mesfushorin kosovar të Galatasarayt, Lorik Cana, shkruan të martën gazeta "Daily Star". Trajneri i Wolvesit, Mick McCarthy, është në kërkim të një mesfushori defensiv dhe për këtë ka vënë në shënjestër kosovarin 27-vjeçar. Cana në edicionin e shkuar luajti në Premier League me Sunderlandin para se të transferohet te Galatasaray dhe nuk është i panjohur në ishull.
McCarthy dëshiron një futbollist luftarak dhe për Canën është i gatshëm t'i shpenzojë deri në gjashtë milionë euro. Ai dëshiron të bashkojë Canën me Ronald Zubarin, pasi kjo dyshe për tre vjet ka luajtur së bashku tek ekipi francez, Olympique Marseille.
"McCarthy është hedhur në treg për një mesfushor të fortë dhe luftarak. Ai synon gjatë këtij muaji të forcojë ekipin e tij, kurse interesim ka treguar për Canën, të cilin e do në ekip për ta bashkuar me Zubarin", shkruan gazeta angleze.
Mesfushori i Kombëtares së Shqipërisë para fillimit të këtij edicioni u transferua te Galatasaray, që i pagoi Sunderlandit një dëmshpërblim prej 4.5 milionë eurosh. Ai me ekipin turk firmosi kontratë deri në qershorin e vitit 2014.
Ai në ndeshjen e fundit te Gallata është aktivizuar në rolin e qendërmbrojtësit në mungesë të mbrojtësve, rol këtë që në Kombëtare e luan tash e sa kohë, po ashtu për shkak të alternativave në mbrojtje.
Interesim për Canën gjatë këtij miniafati kalimtar ka treguar edhe skuadra tjetër angleze Aston Villa.