Presidenti i Jemenit i gatshëm të japë dorëheqje

Sanaa, 22 mars – Një zëdhënës i presidentit të Jemenit, Ali Abdullah Saleh, ka deklaruar sot se lideri jemenas është i gatshëm të japë dorëheqje në fund të vitit si pjesë e transferimit “kushtetues” të pushtetit.
Saleh kishte informuar zyrtarët e lartë jemenas, komandantët e ushtrisë dhe liderët e fiseve në një takim që zhvilloi dje në mbrëmje, transmeton AP.
Saleh ka paralajmëruar më parë për mundësinë e shpërthimit të luftës civile në Jemen, për shkak të përpjekjeve për të kryer “grushtet” kundër sundimit të tij.
Disa gjeneralë, ambasadorë, funksionarë shtetëror dhe fise përkrahen demonstruesit në Jemen, të cilët nga 21 shkurti kërkojnë dorëheqjen e presidentit. Ata dolën krahas demonstruesve në rrugë për arsye se gjatë së premtes, snajperistët kishin vrarë 52 civilë në kryeqytetin Sanna, me ç’rast Saleh shpërbeu qeverinë dhe vendosi gjendje të jashtëzakonshme në vend për 30 ditë. Sipas gjeneralëve jemenas, represioni ndaj demonstruesve paqësorë dërgon deri tek lufta civile. Ambasadorët e Jemenit në Siri, Arabi Saudite, Libi, Egjipt, Ligën Arabe dhe Kinë kanë dhënë dorëheqje dhe janë bashkuar me demonstrues, ndërsa të njëjtën gjë e bëri edhe Abdullah Alaiwa, ish-ministër i Mbrojtjes dhe këshilltar i Shtabit të përgjithshëm të ushtrisë jemenase.