Kosovarët këshillohen të mos udhëtojnë në Egjipt

Ministria e Punëve të Jashtme e Republikës së Kosovës po i ndjek me vëmendje zhvillimet e fundit në Egjipt dhe udhëzoi qytetarët e Kosovës me qëndrim në Egjipt që të kthehen në vend.

Në komunikatën e MPJ-së bëhet e ditur se shtetasit e Kosovës janë rigrupuar dhe kanë lëvizje shumë të kufizuar. Duke qenë kryesisht studentë, disa janë tubuar me studentë të shteteve tjera dhe të tjerë janë rigrupuar në lagjet e kryeqytetit Kairo.

“Në mungesë të marrëdhënieve diplomatike me Republikën e Egjiptit, MPJ e Kosovës po vepron nëpërmjet kanaleve të saj diplomatike në vendet e afërta që t’i ndjek nga afër zhvillimet e situatës. Nga informacioni i pranuar merret vesh se në Egjipt, kryesisht në kryeqytetin Kajro janë rreth 30 shtetas të Republikës së Kosovës, të cilët në kushtet e krijuara rishtazi janë të paprekur dhe mirë me shëndet”, thuhet në komunikatë.

Dy shtetas kosovarë, studentë në Kajro janë evakuuar me anë të ambasadës së Republikës së Shqipërisë. “Mbrëmë vonë dy studentët janë asistuar nga personeli i ambasadës së Republikës së Kosovës në Tiranë dhe kanë mbërritur në Kosovë”, thuhet në njoftim.

Ministria e Punëve të Jashtme e Republikës së Kosovës i këshillon qytetarët e Kosovës të mos udhëtojnë për në Egjipt, ndërsa atyre me qëndrim në Egjipt iu sugjeron të kthehen në vend