Vazhdon evakuimi i shtetasve të Kosovës nga Egjipti

Ka arritur të shtunën grupi i radhës i personave të evakuuar nga Egjipti, në të cilin, konform rregullave ndërkombëtare, përveç shtetasve të Kosovës të evakuuar kanë qenë dhe familjarët e ngushtë, bashkëshortë dhe fëmijë, të shtetasve kosovarë por me shtetësi egjiptiane- njofton MPJ.

“Ministria e Punëve të Jashtme është duke ndjekur me përkushtim rrjedhën e zhvillimeve të fundit në Egjipt, duke vënë theks të veçantë në evakuimin e shtetasve të Kosovës nga Egjipti për në Kosovë apo shtete të tjera jashtë zonës së rrezikut. Koordinimi për evakuimin e shtetasve të Kosovës po bëhet përmes Ambasadës së Kosovës në Ankara, e cila në bashkëpunim të ngushtë me Ministrinë e Punëve të Jashtme të Turqisë, përkatësisht Ambasadën e Turqisë në Kajro, në bashkëpunim me Ambasadën e Egjiptit në Ankara dhe përmes Turkish Airlines kanë mundësuar evakuimin e shtetasve të Kosovës”, thuhet në njoftim”.

Të dielën pritet të evakuohet nga zona e rrezikshme grupi i radhës, të cilët janë pajisur me dokumentacionin e nevojshëm për kthim në Kosovë.

MPJ njofton edhe një herë personat e pajisur me fletëudhëtim nga Ambasada e Kosovës në Ankara lidhur me kërkesën e autoriteteve egjiptiane për t’u lajmëruar pranë Ambasadës së Kosovës në Ankara tri orë para nisjes për në Aeroportin e Kajros.
Kjo kërkesë vjen si pasojë e gjendjes së jashtëzakonshme në të cilën aktualisht gjendet Republika Arabe e Egjiptit.

Ministria e Punëve të Jashtme, përveç koordinimit për evakuimin e shtetasve nga Egjipti në Kosovë mbulon të gjitha shpenzimet për realizimin e këtij evakuimi