Arabia Saudite vazhdon lobimin për njohjen e Kosovës

Arabia Saudite vazhdon lobimin për njohjen e Kosovës

Është e drejta e një populli të kërkojë liri- u shprehur mes tjerash kryesuesi i grupit parlamentar të Arabisë Saudite, Mohamad Bin Sa’ad Alsalem, në takimin që pati të martën me kryeministrin e Shqipërisë, Sali Berisha, duke iu referuar pavarësisë së Kosovës.
Mohamad Bin Sa'ad Alsalem njoftoi kryeministrin Berisha për lobimin e vazhdueshëm që bën vendi i tij për njohjen e pavarësisë së Kosovës nga vendet e tjera.

Ndërsa Berisha, nga ana e tij, e falënderoi dhe njëherit shprehu mirënjohjen e tij për vendimin e qeverisë saudite për njohjen e Kosovës.

“Njohja e pavarësisë së Kosovës është një kontribut i rëndësishëm për paqen dhe stabilitetin në rajon”, tha kryeministri Berisha.

Ndërkohë, edhe presidenti Topi, në takimin që pati me grupin parlamentar të Arabisë Saudite, u ndal në situatën në Ballkan, duke thënë se kemi një realitet të ri gjeo-politik me shtetin e ri të Kosovës, të cilin e kanë njohur shumë vende dhe është në rrugën e njohjes nga shtete të tjera. Topi vuri në dukje se Kosova po e ndërton shtetin e saj mbi bazën e multietnicitetit, duke dashur të krijojë një situatë të qetë e të stabilizuar për çdo qytetar të saj.