Pacolli vazhdon lobimin, pritet shumë shpejt njohje

Zëvendëskryeministri i parë i Qeverisë së Republikës së Kosovës,
Behgjet Pacolli, ka filluar edhe ditën e tij të tetë në kontinentin
Afrikan me aktivitete lobuese për njohjen e pavarësisë së Kosovës. Pacolli
gjatë kësaj periudhe ka vizituar Ganën, Nigerinë dhe Marokon, ku është
takuar me udhëheqësit shtetërorë të këtyre shteteve. Telegrafi nëpërmjet
burimeve të veta ka marrë vesh se zëvendëskryeministri Behgjet Pacolli
është duke u angazhuar fuqishëm që në Kosovë të kthehet me rezultate
konkrete.
Po ashtu, merret vesh se Pacolli është duke punuar edhe në atë
drejtim që Kosova shumë shpejt të fitojë statusin e vëzhguesit (Observer
Status), në Organizatën e Kombeve të Bashkuara, status të cilin deri në
vitin 2000 e kishte edhe shteti i Zvicrës.
Menjëherë pas përfundimit të vizitës në Afrikë, Pacolli do të
udhëtojë për në Astana të Kazakistanit, në konferencën e ministrave të
punëve të Jashtme të Organizatës së vendeve Islamike. /Telegrafi/