Pacolli vazhdon lobimin në Afrikën Qendrore

Zëvendëskryeministri i parë i Republikës së Kosovës, Behgjet
Pacolli po vazhdon aktivitetet e tij në Afrikë, në kuadër të fushatës
lobuese për shtimin e numrit të njohjeve për shtetin e pavarur të
Kosovës.Zëvendëskryeministri Pacolli është takuar të martën
me përfaqësuesit më të lartë të institucioneve të Guinea Conakry, ku ka
diskutuar për përshpejtim të njohjes së pavarësisë së Kosovës nga ky
vend. Më pas Pacolli ka vazhduar angazhimet e tij lobuese në Togo, në
kryeqytetin Lome, ku është takuar me zëvendëspresidentin e këtij shteti.
Pacolli të martën në mbrëmje do të udhëtoj për në Lagos ku do të
takohet me kryetarin e Komunitetit Ekonomik të shteteve të Afrikës
Perendimore, James Victor Gbebo. Ndërkaq të mërkurën,
zëvendëskryeministri i parë i Kosovës, do të udhëtojë në Afrikën
Qendrore, konkretisht në Republikën e Ruandës, ku do të takoj
kryeministrin e këtij vendi, Bernard Makuza.
“Qëllimi kryesor i këtij takimi do të jetë kërkesa drejtuar
autoriteve më të larta të Republikës së Rëandës për njohje sa më të
shpejtë të pavarësisë së Kosovës. Zëvendëskryeministri Pacolli gjatë
qëndrimit në këtë shtet do të shfrytëzoj të gjithë argumentet e
nevojshme të cilat dëshmojnë progresin demokratik që ka shënuar Kosova
viteve të fundit si dhe nevojën që ka vendi ynë për njohje të reja, në
mënyrë që të hapet rrugë në drejtim të integrimeve euroatlantike”,
thuhet në një njoftim të Zyrës së Pacollit.
Pacolli, ditët e fundit ka qëndruar në Afrikën, ku ka pasur takime me
përfaqësuesit më të lartë të shtetit të Ganës dhe ka marrë pjesë në
Ceremoninë Inauguruese të Presidentit të ri të Bregut të Fildishtë, duke
takuar një sërë personalitetesh përfaqësuese nga vende ndryshme të
botës. Angazhimet e tij në kuadër të kompetencave të tij institucionale
për shtimin e numrit të njohjeve për shtetin e pavarur të Kosovës,
thuhet se do të vazhdojnë me intensitet të shtuar edhe në ditët në
vijim. /Telegrafi/