Pacolli nuk e vazhdon debatin me Dellin

Behgjet Pacolli sërish kundërthënës. Nuk e vazhdon dot debatin në distancë me ambasadorin amerikan, Christopher Dell. “Let’s talk about the future”, ka thënë në anglisht ish-presidenti kur është pyetur nëse qëndron ende pas deklaratave se emri i presidentes Jahjaga ka dalë nga zarfi.
Në një intervistë për emisionin Interaktiv të KTV-së Pacolli ka thënë se nuk dëshiron ta kthejë atë episod dhe mendon se është bërë mirë që vendi ka dalë nga kriza me zgjedhjen e presidentes së re.

Ai ka treguar se Thaçi ia ka ofruar postin e ministrit të Jashtëm, por ai e ka refuzuar për shkak të konsideratës ndaj ministrit Enver Hoxhaj. Ka thënë se personalisht e ka siguruar Hoxhajn të mos ketë merak se do t’ia zërë vendin. Pacolli ka thënë se ndjehet i lënduar dhe i traumatizuar pas asaj që ka ndodhur, dhe se javën e ardhshme do të vendos nëse do të pranojë postin e zv/kryeministrit të parë në qeveri, transmeton Indeksonline.

Nuk do t’ia harrojë kurrë Jakup Krasniqit, që sipas tij, nuk lejoi as buqeta me lule për zgjedhjen e tij, por nuk do t’ia harrojë fjalët as Limajt, për të cilin tha se dha kontribut financiar në lirimin e Hagës. Po mendon gjithashtu ende nëse do të kthehet në krye të AKR-së, por të sigurt e ka vetëm qëndrimin në Kosovë. /Telegrafi/