Pacolli falënderon Sosan për angazhimin për njohje

Në një takim me zëvendëskryeministrin e parë të Kosovës, Behgjet
Pacolli, presidenti i Hondurasit, Porfirio Lobo Sosa, ka shprehur
gatishmërinë për të zhvilluar marrëdhëniet me Kosovën në fushën e
energjetikës, të infrastrukturës, si dhe premtoi angazhimin për njohje
të reja të shtetit të Kosovës.Gjatë takimit, Pacolli e ka
falënderuar presidentin Sosa dhe e ka vlerësuar kontributin e tij për
Kosovën sidomos për aktin e njohjes së Kosovës nga ky shtet mik.

”Zoti Sosa, ju jeni një mik i madh i Kosovës. Ju jeni të angazhuar në
procesin e njohjeve në rajonin tuaj dhe këtë e tregon prania në
delegacionin tuaj e kreut të partisë kryesore të Salvadorit që fitoi
zgjedhjet e fundit, e një zyrtari të lartë të Guatemalës dhe
Nikaraguas”, është shprehur Pacolli.

Presidenti i Hondurasit e vlerësoi shumë pritjen e ngrohtë që i ishte
rezervuar dhe përsëriti angazhimin e tij për të punuar për Kosovën.
/Telegrafi/