Edhe një viktimë, deri tash 282 raste me virusin AH1N1

Prishtinë, 22 shkurt - Të dielën mbrëma në Klinikën Infektive të QKUK, në Prishtinë, u nda nga jeta Enver Mazreku (40), profesor i kimisë, drejtor i shkollës fillore në fshatin Opterushë dhe anëtar i Kryesisë së Degës në LDK në Rahovec, njofton Telegrafi I ndjeri ishte prekur nga virusi AH1N1 dhe përreth dy javë qëndroi i shtrirë në QKUK dhe me gjithë përpjekjet e mjekëve të Klinikës Infektive, ai vdiq të dielën rreth mesnatës.
Ceremonia mortore e varrimit të Enver Mazrekut u bë të hënën Ndërkohë, siç njofton “Express” konsiliumi i QKUK-së është mbledhur sot për të analizuar dhe diskutuar situatën e fundit në vend, të krijuar nga pandemia e gripit A H1N1.

U bë e ditur se nga data 20 dhjetor 2010 deri më 21 shkurt 2011, në QKUK, gjegjësisht në Klinikën Infektive, nëpër reparte dhe në Mjekimin Intensiv të Klinikës Infektive, deri me sot janë hospitalizuar dhe trajtuar 282 raste me shenja për grip dhe të dyshimta për infeksion me H1N1.

Nga 282 rastet, në 182 prej tyre është dokumentuar infeksioni me virusin e gripit H1N1, dhe në 60 influenca sezonale A.

Nga 20 dhjetor 2010 deri më 21 shkurt 2011, në Klinikën Infektive, QKUK, 4 të sëmurë kanë pasur ecuri fatale, prej të cilëve, në 2 të sëmurë Infeksioni me virusin H1N1 ishte fatal, ndërsa 2 rastet tjerë kishin sëmundje të rënda paraprake predispozuese, ndërsa infeksioni me H1N1 ishte faktor i përkeqësimit.

Momentalisht në Klinikën Infektive, gjenden në mjekim edhe 15 të sëmurë nga gjendja gripoze, por ende e pakonfirmuar. Nga këta pacientë, 3 janë në gjendje të rëndë shëndetësore dhe janë duke u trajtuar në mjekimin Intensiv të Klinikës Infektive.