Bundesliga : Dortmundi shkel Bayernin

Kampioni në fuqi i Gjermanisë, Bayern Munich, është turpëruar para tifozëve të vet nga lideri aktual i Bundesligas, Borussia Dortmund, që ka shënuar fitore me rezultat 3-1 në Allianz Arena.
Lucas Barrios kaloi mysafirët në epërsi (9’), ndërsa Luiz Gustavo barazoi pas asistimit të Franck Ribery (16’), mirëpo kjo ishte krejt çka bënë vendasit në këtë përballje sa u përket golave.

Dy minuta më pas, Nuri Sahin riktheu epërsinë e Dortmundit dhe vendosi rezultatin e gjysmës së parë.

Ndërkohë, pas një ore lojë, Mats Hummels vulosi takimin duke shënuar edhe golin e tretë për kryesuesin e tabelës në Kampionatin gjerman.

Me tre pikët e reja, Borussia Dortmund përforcohet në krye me 13 pikë më shumë se përcjellësi i parë, Bayer Leverkusen, që të dielën zhvillon derbin ndaj Werder Bremen.

Ndërkohë, në pjesën e mbetur të kampionatit, Bayerni do të luftojë për një vend që çon në Ligën e Kampionëve. /Telegrafi/