Van Gaal, pranë shkarkimit nga Bayerni

Berlin, 4 mars - Trajneri holandez, Luis van Gaal, pritet të shkarkohet nga Bayern Muencheni nëse dështon në ndeshjen e fundjavës kundër Hannoverit, shkruan gazeta gjermane "Bild" të enjten. Krerët e Bayernit kanë humbur durimin me strategun holandez, ndërsa kulmi ishte në ndeshjen e së mërkurës mbrëma ku Bayerni para tifozëve të vet u eliminua në gjysmëfinale të Kupës së Gjermanisë nga Schalke me rezultatin 1:0. Edhe gjasat për të fituar titullin e Gjermanisë janë zbehur shumë, veçanërisht pas disfatës që pësoi në fundjavë nga liderja Borussia Dortmund 3:1.