Arrestohen në kërkim të thesarit të Lekës së Madh

Athinë, 18 mars - Një justifikim të pabesueshëm kanë gjetur katër “gjuetarë thesaresh” në Aleksandropulos, kur u zbuluan dhe u arrestuan nga policia. Ata thanë se po kërkonin thesarin e Aleksandrit të Madh dhe se me të donin të shpëtonin Greqinë nga vështirësitë që po përjeton për shkak të krizës ekonomike.

Një pensionist, ish-kapiten anije dhe tre miq të tij të papunë, kishin hartuar një projekt sipas disa hartave dhe gojëdhënave, me të cilin shpresonin të zbulonin thesarin aq të kërkuar të Aleksandrit të Madh.

Ata hapën një gropë të madhe, duke përdorur kompresorë, gjeneratorë, lopata, në një zonë të vështirë, por u pikasën nga barinjtë. Si njofton Balkanweb, këta të fundit lajmëruan policinë, që i arrestoi gërmuesit me akuzën për “gërmime ilegale” dhe iu konfiskoi atyre gjithë mjetet e punës, duke iu prerë kështu në mes ëndrrën për gjetjen e thesarit të Lekës së Madh.