Turkmenistan, 6 820 dollarë për abonimin mujor në internet

Vendi i vogël aziatik, i pasur me naftë, renditet i pari në botë dhe shumë i shkëputur nga vendi i dytë për sa i përket tarifave mujore të internetit. Bëhet fjalë për ish republikën sovjetike, kurse nga viti 1990 shtetin e pavarur të Turkmenistanit.

Një abonim mujor i pakufizuar, me shpejtësi të lartë, i konsideruar si një standard normal në vendet perëndimore, në Turkmenistan kushton plot 6 820 dollarë.

Shifra bëhet edhe më domethënëse duke pasur parasysh se paga mesatare për një qytetar të këtij vendi sillet rreth 200 dollarë në muaj.

Ndonëse ka nga ata që paguajnë shuma te larta të hollash në muaj për një abonim mujor, përsëri është praktikisht e pamundur të hysh në internet gjatë ditës, transmeton TCH. Rrjeti zhbllokohet vetëm natën dhe faqet që mund të shikohen janë të pakta, për shkak të censurës së rëndë shtetërore, e cila bllokon edhe postën elektronike, nëse përmenden fjalë të caktuara në korrespondencë.