Lindje të shpeshta të fëmijëve me malformacione gjenitale

Konsiderohet se çdo ditë lind një fëmijë me malformacione gjenitale, dëmtime ne fshikëzën e urinës, por edhe fëmijë që lindin me dy gjini njëkohësisht.

Kirurgët pohojnë se, numri i fëmijëve që lindin me malformacione gjenitale, është i lartë. Në Kosovë këto malformacione jo vetëm që nuk janë të rralla, por ato diagnostikohen në faza të avancuara, pasi ndërhyrjet nuk realizohen kur fëmijët janë në moshën përkatëse me ç’rast paraqiten edhe probleme serioze. Ekspertët e urologjisë së fëmijëve, kanë zbuluar probleme serioze pikërisht në keqformimet gjenitale të cilat janë shumë të shpeshta, duke mos përjashtuar edhe vendin tonë ku numri i lindjeve është shumë i madh dhe kjo përkon me rritjen e përqindjes së lindjes së fëmijëve me malformacione, në këtë rast, gjenitale.

Në vendet e zhvilluara këto malformacione diagnostikohen dhe trajtohen me kohë, para lindjes ose menjëherë pas lindjes, fatkeqësisht te në dhe në rajon mund të kalojnë katër apo pesë vite të moshës së fëmijës dhe pastaj të bëhet ndërhyrja kirurgjike.

Derisa në Kosovë nuk ekzistojnë llogaritje të sakta, në Shqipëri vlerësohet se çdo vit regjistrohen mbi 300 raste të reja të fëmijëve të lindur me malformacione dhe deformime. /Telegrafi/