Behrami mungon vetëm tri javë

Romë, 30 mars - Lëndimi i mesfushorit kosovar, Valon Behrami, është më i lehtë se sa është menduar para pak ditëve, shkruan të martën sajti "violanews.com". Behrami 25-vjeçar do t'i mungojë Fiorentinës për tri javë. Ai në ndeshjen eliminatore që Zvicra e zhvilloi kundër Bullgarisë, të shtunën, lëndoi ligamentet e gjurit dhe u detyrua ta lëshonte fushën pas 17 minutave lojë. "Është një lajm i mirë që Behrami nuk do të qëndrojë gjatë jashtë fushës sa është parashikuar në fillim. Por, lajm i keq është që ai do t'i mungojë Fiorentinës në ndeshjet kundër Juventusit, Cessenas e Milanit", thuhet në sajtin "violanews.com". Ai te Fiorentina u transferua në janar nga West Hami.