Apple më e vlefshme se Microsoft

Kompania Apple, sipas vlerës së aksioneve në bursën Nasdaq, ka tejkaluar gjigantin Microsoft i cili deri më tani ka bartur titullin e kompanisë më të vlefshme teknologjike sipas vlerës së aksioneve në treg.
Pas mbylljes së shitblerjeve të mërkurën vlera e përgjithshme e aksioneve të Apple ka qenë 222 miliardë dollarë, derisa në të njëjtën kohë vlera e Microsoft ka qenë 219 miliardë dollarë.

Në fakt, vlera e aksioneve të Apple të mërkurën në bursën Nasdaq është rritur për 0.4%, në 244.11 dollarë, derisa në të njëjtën kohë vlera e Microsoftit ka rënë 4%, në 25.01 dollarë, që është niveli më i ulët gjatë shtatë muajve të fundit. Apple në të kaluarën ka qenë më e vlefshme se Microsoft, mirëpo sipas të dhënave të agjencisë së njohur të lajmeve Reuters, herën e fundit që vlera e aksioneve të Microsoftit ka qenë më e ulët sesa ato të Apple ishte 19 dhjetori i vitit 1989.

Aktualisht aksionet e Apple janë më shumë se dhjetë herë më të vlefshme se para dhjetë vitesh, e është interesante që ka qenë po Microsofti ai që ka shpëtuar kompaninë Apple nga falimentimi në vitin 1997 duke investuar 150 milionë dollarë në të.

Megjithatë, Microsoft është ende para Apple sipas qarkullimit të realizuar, respektivisht kjo kompani në tremujorin e fundit ka realizuar 14.5 miliardë dollarë qarkullim, derisa qarkullimi i Apple ka qenë 13.5 miliardë dollarë amerikanë.