AGPK dënon sulmin ndaj fotoreporteres së Zërit

Asociacioni i Gazetarëve Profesionist të Kosovës (AGPK) ka pranuar me shqetësim lajmin se zyrtari për informim i Kuvendit të Kosovës, Sherif Konjufca, ka sulmuar gjatë kryerjes së detyrës fotoreporteren e gazetës “Zëri”, Laura Hasani. Ngjarja ka ndodhur të enjten, gjatë kohës së mbajtjes së seancës së Kuvendit, në të cilën u zgjodh Presidentja e Kosovës, Atifete Jahjaga.
“Konjufca, gjoja për të ndaluar të mos bëjë fotografi, e ka tërhequr zvarrë fotoreporteren Hasani në sy edhe të gazetarëve të tjerë. Është dashur të ndërhyjë deputeti Lutfi Haziri për të parandaluar këtë akt të pahijshëm të përfaqësuesit për informim të ligjvënësit, Sherif Konjufca”, ka njoftuar “Zëri”.

Sipas gazetës, Konjufca madje e ka kërcënuar Laura Hasanin se nuk do t’i japë akreditim për t’i përcjellë seancat plenare dhe aktivitetet e tjera të Kuvendit të Kosovës.

AGPK dënon ashpër këtë sulm ndaj Hasanit dhe çdo lloj sulmi e kërcënimi tjetër që iu bëhet gazetarëve gjatë kryerjes së punës së tyre.

AGPK konsideron se kërcënimi i gazetarëve paraqet shkelje të lirisë së shprehjes dhe lirisë së informacionit, të drejta këto shumë të rëndësishme për funksionimin e demokracisë.

AGPK u bën thirrje institucioneve përgjegjëse të hetojnë këtë rast me seriozitet. Po ashtu, AGPK i bën thirrje Kuvendit të Kosovës që të distancohet nga veprimi i Konjufcës dhe ta dënojë publikisht rastin e sulmit ndaj Hasanit. /Telegrafi/