Pacolli nuk është njoftuar për detyrat e tij

Behgjet Pacolli ka thënë të martën se ai nuk është i njoftuar dhe nuk i ka të qarta detyrat e tij të zëvendëskryeministrit të parë. Pacolli ka thënë për Radio Dukagjinin se nëse paraqet pengesë për dikë dhe puna e tij mund të interferoj në përzierje të kompetencave, ai mund dhe është i gatshëm të jap dorëheqje edhe nga kjo pozitë.
Behgjet Pacolli hoqi dorë nga kandidati për president. Është i gatshëm të heqë dorë edhe nga posti i ri të cilin ia ka ndarë kryeministri Hashim Thaçi, atë të zëvendëskryeministrit të parë, që e ngarkon atë për marrëdhënie ndërkombëtare, për të siguruar njohje të reja si dhe për të sjellë investime të huaja në Republikën e Kosovës.

“Ende nuk kam një vendim nga Qeveria ku janë të përcaktuara detyrat dhe përgjegjësitë e mija. Unë nuk jam i gatshëm që t’i kundërvihem apo të jem pengesë e dikujt tjetër që është duke vazhduar punën. Në rast se mund të thuhet se MPJ është në rrugë të mirë dhe ka të gjitha performancat që të qojë procesin e njohjeve përpara, atëherë unë mund edhe të largohem, absolutisht nuk kam problem”, tha ai.

Nga ana tjetër, Yll Hoxha nga Klubi për Politikë të Jashtme ka theksuar se politika e jashtme është shndërruar në pazar politik. /Telegrafi/