Mbikëqyrjes s’i dihet fundi

Faza e mbikëqyrjes së pavarësisë së Kosovës nuk ka një afat të përcaktuar, thonë në Zyrën Civile Ndërkombëtare (ICO).
Kjo Zyrë Ndërkombëtare ka mandatin të mbikëqyrë zbatimin e Planit Gjithëpërfshirës për Statusin e Kosovës, i njohur si Plani i Ahtisaarit. Përderisa mbikëqyrja e zbatimit të këtij plani vazhdon, për aq vazhdon edhe mbikëqyrja e pavarësisë së Kosovës, shkruan Zëri.

Zëdhënësi i ICO-së në Prishtinë, Andy McGuffie, thotë se Kosova ka bërë progres të konsiderueshëm që nga pavarësia e saj. “Një pjesë e tij mund të shihet në arritjet që ka Qeveria e Kosovës ka bërë së bashku me ICO-në në implementimin e Planit të Ahtisaarit”, tha ai.

“Përmbushja e vazhdueshme e objektivave ka bërë që ICO-ja të reduktohet me rreth 25 % këtë vit, pas reduktimit prej 13 % të vitit të kaluar, kështu që stafi ynë aktualisht përbëhet 165 punjonës, shumica prej të cilëve janë kosovarë. Kjo tregon se ne jemi organizatë dinamike, që i përgjigjemi progresit të bërë nga Kosova”, thotë McGuffie.

Nëse do t’u referoheshim deklaratave publike të kryeministrit Hashim Thaçi, Kosova qysh para një viti e gjysmë kishte përmbushur 90 % të planit të Ahtisaarit dhe rrjedhimisht këtë vit do ta përfundonte edhe atë 10 përqindëshin e mbetur.

Përgjigja ndërkombëtare për kosovarët tash për tash është se nuk duhet se kur do të mund të qëndrojnë në këmbët e veta pa ndërkombëtarët anash tyre.

Marrë parasysh se ngecjet më të mëdha në shtetin e Kosovës janë në veriun e saj ku komuniteti serb mbetet peng i politikave të Beogradit zyrtar, edhe ICO premton angazhim më të shtuar në këtë pjesë.

“Duke punuar së bashku me Qeverinë e Kosovës ne do të vazhdojmë të adresojmë prioritetet e mbetura me të cilat jemi pajtuar në mënyrë sa më efikase që të jetë e mundur. Këto prioritete përfshijnë krijimin e komunës së re të Mitrovicës së Veriut, sigurimin dhe shfrytëzimin si bazë të arritjeve në decentralizim dhe përkujdesjen për mbrojtjen e trashëgimisë fetare dhe kulturore dhe të drejtave të komuniteteve”, sqaron McGuffie. /Telegrafi/