Sejdiu: Në Kuvendin Zgjedhor do të dihet se kush do ta drejtojë LDK-në

Prishtinë, 3 nëntor - LDK-ja këtë të diel do të mbajë Kuvendin e Shtatë Zgjedhor të partisë, ku do të zgjedhën organet e reja drejtuese, përshirë edhe kryetarin e partisë. Lajmin e ka bërë të ditur, pas një mbledhje të Kryesisë së LDK-së, lideri aktual i saj, Fatmir Sejdiu, sipas të cilit e diela do të jetë ditë e rëndësishme për vendimet që e presin LDK-në, por nuk ka treguar qartë se a do të kandidojë a jo për një mandat të dytë në krye të partisë. I pyetur për paralajmërimet e kryetarit të degës së LDK-së në Suharekë, Sali Asllanaj, që të hënën i ka thënë KTV-së se mund ta kandidojë kryetarin e Prishtinës, Isa Mustafa, për lider të partisë, Fatmir Sejdiu është shprehur se çdo anëtar i LDK-së ka të drejtë të kandidojë në Kuvendin Zgjedhor. Duke thënë se e çmon lart Mustafën, Sejdiu ka theksuar se verdikti se kush do të drejtojë partinë do të dihet vetëm në Kuvendin Zgjedhor të partisë të dielën. Kurse, anëtari i Kryesisë së LDK-së, Ali Lajçi, sërish ka kritikuar udhëheqjen aktuale të partisë. I vetmi shpëtim për LDK-në është largimi i Sejdiut nga partia, ka thënë Lajçi.