Eksperiment zgjedhor

Edhe pse brenda pak ditësh do të fillojë punën Komisioni për
reformën zgjedhore, ende askush nuk e ka të qartë se çfarë sistemi
zgjedhor i duhet Kosovës. Ndonëse ekspertët kanë kërkuar që në kuadër të
këtyre ndryshimeve sistemi zgjedhor të jetë i kombinuar, përfaqësuesit e
partive që janë pjesë e Komisionit për ndryshimin e Ligjit zgjedhor nuk
e kanë idenë se çfarë ndryshimesh duhet të ndodhin.Kjo
reformë zgjedhore, siç konsiderojnë analistët, duket se po i ngjan një
eksperimenti. Mazllum Baraliu, analist i çështjeve zgjedhore konsideron
se Kosovës aktualisht i duhet një sistem zgjedhor proporcional, me lista
të hapura, por me numër të kufizuar të deputetëve, shkruan Zëri.
“Pra, të votohet vetëm për një kandidat dhe natyrisht për partinë.
Kjo duhet të bëhet për shkak të mentalitetit që ka Kosova dhe për shkak
të keqpërdorimeve që mund të ndodhin dhe për të pasur një sistem më të
lirë dhe për numërim të rezultateve”, ka thënë Baraliu.
Kjo, sipas tij, nuk është jodemokratike, sepse respektohet vota ose
parimi i shenjtë i votës, standardi më i rëndësishëm ndërkombëtar: një
votë një qytetar. “Kjo do të ishte mënyra më e mirë dhe sistemi më i
mirë i votimit”, thotë ai.
Në anën tjetër, njohësi i sistemeve zgjedhore, Xhavit Shala, ka thënë
se tash për tash Kosova duhet ta ketë një sistem zgjedhor të kombinuar.
Sipas tij, aplikimi i një sistemi zgjedhor të kombinuar i plotëson
dhe mundëson që opinionet e qytetarëve të përfaqësohen më bindshëm.
/Telegrafi/