Rama: Shqipëria është kapur në fyt nga diktatura

Kryetari i Partisë Socialiste tha të mërkurën në Shkodër se shihte entuziazëm tek qytetarët, duke e bërë të besonte në fitoren e opozitës në 8 maj.
Sipas Edi Ramës, ky ishte mesazh i qartë se me votën për të majtët zgjedhësit do ta kthenin procesin në një demonstratë të fuqishme anti-qeveri.

“Shqipëria sot është kapur nga fyti prej diktaturës së kusarisë që flet për ju e mendon e punon vetëm për vete. Është koha e pjesëmarrjes së të gjithëve në procesin e demokracisë, për të çliruar votën e lirë”, nënvizoi Rama.

Ai fajësoi kryeministrin Berisha dhe kryetaren e Kuvendit Topalli, sipas tij për gjendjen e rëndë ekonomike ku është zhytur vendi. “Unë ndjej domosdoshmërinë për ta nxjerrë Shqipërinë nga kurthi i varfërisë dhe i papunësisë. Saliu e Jozefina përfaqëson pushtetin që prej vitesh po vjedh Shqipërinë”, tha Rama.

Në Shkodër për koalicionin “Aleanca për të Ardhmen” garon socialisti Genc Uruçi./Telegrafi/