Rama: PS në anën e duhur të historisë

Kryetari i Partisë Socialiste, Edi Rama, në fjalën përshëndetëse në ceremoninë e 20 vjetorit të kësaj partie të dielën, tha se të gjithë anëtarët e kësaj force politike duhet të ndjehen krenarë sot pas 20 vitesh, pasi kjo parti është “pozicionuar në anën e duhur të historisë duke mbrojtur gjithmonë interesat kombëtare të Shqipërisë dhe shqiptarëve”.

“Partia Socialiste në 20 vjetorin e themelimit të saj ka arsye për të qenë krenare, Partia Socialiste është pozicionuar në anën e duhur të historisë dhe ka mbrojtur gjithmonë interesat kombëtare të shqiptarëve. Falënderojmë të gjithë ata që kanë ndihmuar Shqipërinë në këto 20 vjet”, tha zoti Rama në fjalën e tij.

Pasi falënderoi njerëzit që kanë kontribuar në rritjen e kësaj partie, zoti Rama përmendi tre nga themelet ku mbështetet kjo forcë politike.

“Zakoni e do që duhen thënë vetëm fjalë të mira. Unë sot do të rendis tre prej tyre. Ne jemi parti që bëmë gjënë e duhur për interesin kombëtar. Respektojmë të gjithë qytetarët, liritë e të drejtat e tyre. Punojmë për të ndryshuar për mirë Shqipërinë. Mirënjohje për ata që kanë kontribuar në 20 vjet!”, shtoi zoti Rama.

Kryetari i PS-së theksoi se në Partinë Socialiste “nuk ka munguar asnjëherë liria, kjo e bën të madhe forcën për të rezistuar ndaj çdo sulmi që i bëhet lirisë”.

Në këtë ceremoni ishin rreth 800 të ftuar, midis të cilëve deputetë, drejtues të lartë të PS-së e simpatizantëve, personalitete nga trupi diplomatik, mes të cilëve edhe ambasadori OSBE-së, Eugen Wolfarth, ambasadori i BE-së, Ettore Sequi, intelektualë vendas dhe përfaqësues të medias./Telegrafi/