Prishtina fiton kundër Bambit, rrahje e Plisave me policë (Video)

Prishtinë, 21 prill –(E plotësuar)-Është rikthyer dhuna në palestrat tona sportive. Pamje të ushtrimit të dhunës janë parë në ndeshjen midis Prishtinës dhe Bambit nga Mitrovica. Gjatë përleshjes, policia ka përdorur shkopinj gome dhe sprej, gjë që ka shkaktuar lëndimin e shumë tifozëve nga radhët e Plisave.
Zyrtarisht, Policia e Kosovës ka thënë se ka qenë e planifikuar ardhja e njësisë speciale nga Mitrovica, që përbëhet kryesisht nga policë serbë. Por, në xhirime shihet një zyrtar i lartë policor të kritikonte hapur të tjerët, duke thënë se nuk kishin urdhër për intervenim. Edhe zyrtarë të Federatës kanë thënë se nuk është dashur të vinte Njësia speciale e Mitrovicës.
Tifozët e Prishtinës Plisat kanë festuar fitoren në mënyrën që nuk u ka pëlqyer këtyre policëve të Njësisë speciale të rajonit të Mitrovicës, që përbëhet kryesisht nga serbët, raporton KTV-ja. Ata ia kanë mësyrë dhunshëm tifozëve, duke mos kursyer askënd.
Reagimi i policisë irritoi edhe më shumë tifozët vendës.
Ndërhyrja e policisë duket se u bë duke mos respektuar zinxhirin komandues, gjë që shkaktoi mosmarrëveshje.
Pas daljes jashtë palestrës, Plisat kanë nisur hedhjen e gurëve në drejtim të policisë. E përleshja ka vazhduar edhe jashtë ambienteve të Pallatit të Rinisë dhe Sporteve.
Plisat kanë dëmtuar disa automjete policie, me ç’rast njërit automjet i është vënë zjarri.
Ndërkohë mësohet se tifozët e lënduar kanë kërkuar ndihmë mjekësore.
Ndeshjen e ka fituar “Sigal Prishtina”, pas vazhdimeve, me rezultat 80:73.