Prishtina ka veç 200 mijë banorë?

Edhe pse është pritur që numri i banorëve rezidentë të kryeqytetit të Prishtinës të jetë mbi gjysmë milioni, një e gjë e tillë duket se nuk do të ndodhë.
Vetëm një ditë para përfundimit të regjistrimit të popullsisë, zyrtarë të komisionit komunal për regjistrimin e popullsisë në komunën e Prishtinës kanë bërë të ditur se deri tani janë regjistruar mbi 95 për qind e qytetarëve të kryeqytetit të Kosovës dhe se numri i banorëve ka rezultuar të jetë 200 mijë.

Halim Halimi, zyrtar për regjistrim, ka thënë se kjo shifër ka dalë nga regjistrimi që është bërë deri më 12 prill.

“Ne gjithmonë marrim informata gjatë regjistrimit dhe deri më 12 prill numri sillet diku afër 200 mijë banorë”, ka thënë Halimi, njofton Zëri.

Sipas tij, kjo shifër e ulët e banorëve të Prishtinës është pasojë e faktit se disa vendbanime që dikur i kanë takuar komunës së Prishtinës, tani bëjnë pjesë në komunën e re të Graçanicës. /Telegrafi/