Kosova ka më pak se dy milionë banorë

Kosova nuk i ka as 2 milionë banorë rezidentë. Rezultati
preliminar i regjistrimit të popullsisë i bërë publik të mërkurën tregon
se në Kosovë jetojnë 1.733 872 vetë. Ndërkohë Prishtina, sipas këtyre
rezultateve, nuk numëron as 200 mijë banorë. Shifra e saktë është 198
214 banorë.Të mërkurën gjatë konferencës për shtyp të
mbajtur nga Ministria e Administratës Publike, Entit të Statistikave dhe
UNOPS ky proces u konsiderua si historik.
Numri i përgjithshëm i banorëve të regjistruar nuk përfshinë edhe ata
të veriut të Mitrovicës, të cilët nuk i janë përgjigjur pozitivisht
thirrjes për regjistrimit. Ky proces në këtë pjesë, sipas
organizatorëve, nuk do të ndodhë edhe për një kohë, pasi banorët në këtë
pjesë nuk kanë shpreh gatishmërinë për bashkëpunim.
“Regjistrimi i popullsisë është projekt i suksesshëm. Por ai nuk do
të mund të realizohet në veri, sepse nuk ekziston gatishmëri nga
qytetarët e atjeshëm për të marrë pjesë në këtë proces”, ka thënë një
ditë më parë ministri i Administratës Publike, Mahir Yagcliar.
Ai ka pranuar se në këtë drejtim kanë dështuar edhe përpjekjet e
Komisionit Evropian dhe të UNOPS-it, të cilët kishin angazhuar një OJQ
për të bërë fushatë sensibilizuese në atë pjesë.
Ndërsa, drejtori i Zyrës për Regjistrimin e Popullsisë në Entin e
Statistikave të Kosovës, Sabri Zabërgja, ka thënë se një ndër faktorët
që ka ndikuar që shteti i ri të mos i ketë as dy milionë banorë është
imigrimi i vazhdueshëm i kosovarëve në shtetet evropiane. Ai pati
konfirmuar se regjistrimit të popullsisë qytetarët i ishin përgjigjur
pozitivisht, por gjatë plotësimit të listave suplementare është vërejtur
se një numër i konsiderueshëm i kosovarëve jetojnë në diasporë.
/Telegrafi/