Në prag të zbulimit të misterit të hapësirës?

Gjenevë, 24 prill – Duket sikur shkencëtarët janë në prag të zbulimit të grimcave që tash për tash ekzistojnë vetëm në teori, dhe për të cilat besohet se i japin “masë” grimcave tjera në gjithësi, raportojnë mediet e shumta botërore lidhur me eksperimentet e shkencëtarëve nga qendra evropiane për hulumtime CERN në Zvicër. Në mesin e shkencëtarëve të cilët punojnë në akseleratorin më të madh botëror të grimcave me energji të madhe, qarkullojnë fjalë se tashmë është konstatuar ekzistenca e grimcave të ashtuquajtura “Grimca të Zotit”. Kjo grimcë e pakapshme është pjesë kyç e modelit standard që përdoret në fizikë për të përshkruar se nga çka përbëhen të gjitha atomet dhe grimcat. Deri te gazetarët ka arritur një dokument interno i cili përmban raporte të pakonfirmuara se një nga detektorët në CERN ka kapur sinjalin që do të mund të ishte grimca e kërkuar gjatë – bozoni i Higsit. Mirëpo, fizikanët janë shumë të matur sa i përket pranimit të zbulimeve të tilla, duke pohuar se shumë grimca që janë paraqitur në eksperimentet e tjera të përplasjes së tyre, kanë dalë se nuk janë ato që kërkohen nga shkencëtarët. Zyrtarët në CERN thonë se rezultati ende nuk është dëshmuar dhe se mund të optimizmi për zbulimin sensacional mund të jetë vetëm thashetheme.