Maqedonasit: Ilirët ishin barbarë

Pas enciklopedisë të mbushur me gënjeshtra dhe fyerje për shqiptarët, të cilët i cilësonte si endacakë, një tjetër skandal ka shpërthyer në Maqedoni e që ka të bëjë sërish me historinë.
Kësaj here bëhet fjalë për librat e historisë së klasës së gjashtë në gjuhën maqedonase në të cilat paraardhësit e shqiptarëve, Ilirët, cilësohen si barbarë- raporton Top Channel.

Lidhur me këtë rast, historiani Skënder Hasani shprehet se identiteti maqedonas është në krizë, ndaj objekt i sulmit janë shqiptarët.

"Elitat politike shkencore maqedonase kanë bërë çmos që të baltosin shqiptarët. Ilirët në tekstet e historisë së klasës së gjashtë paraqiten si fise barbare, që nënkupton se shqiptarët janë problematike që në gjenezë dhe janë e keqja e shoqërisë", shpjegon Hasani. /Telegrafi/