Tribunali i Jeremicit

Shefit të diplomacisë serbe, Vuk Jeremic tashmë i ka dështuar ideja për krijimin e një mekanizmi ad-hoc nga Këshilli i Sigurimit i OKB-së për hetimin e akuzave të Dick Martyt për tregtinë me organe njerëzore në Kosovë dhe Shqipëri gjatë vitit 1999.
Ambasadorët perëndimorë e hodhën poshtë atë, sapo mbërriti në New York, Megjithatë, ai do të përpiqet ta shtyjë idenë e tij në mbledhjen e Këshillit të Sigurimit më 12 maj.

Sipas një dokumenti të Ministrisë së Jashtme të Serbisë, të siguruar nga Express, diplomatët e shteteve përkrahëse të Kosovës, me të drejtë vetoje në Këshillin e Sigurimit, nuk kishin lënë asnjë dilemë. Ata kishin thënë se misioni i BE-së, EULEX, ka aftësi të kryejë një hetim të tillë rreth akuzave të senatorit zviceran dhe që u miratuan nga Parlamenti i Evropës.

“EULEX-i ka mandat të plotë të hetojë këto krime. Nuk mendoj se duhet të krijohet një mandat ad-hoc ndërkombëtar për hetime kur ekziston një i tillë”, ka thënë përfaqësuesja amerikane në OKB, ambasadorja Rosemary DiCarlo. /Telegrafi/