Kabashi: Tribunali po ndëshkon viktimat e jo krimin

Ka filluar dëshmia e Shefqet Kabashit, të konsideruar nga Prokuroria e Tribunalit të Hagës vendimtare në çështjen e Ramush Haradinajt dhe dy ish-bashkëluftëtarëve të tij.

Dëshmitari Shefqet Kabashi, i sjellë me dhunë nga SHBA-të, po refuzon thuaja çfarëdo përgjigje në pyetjet e prokurorit, duke e akuzuar atë dhe Prokurorinë e Tribunalit se po ndjek e ndëshkon viktimat dhe po amniston autorët e krimeve, duke rikujtuar krimet e pandëshkuara serbe në Burgun e Dubravës dhe masakrat e tjera. Momentalisht procesi ka kaluar në një seancë të mbyllur.

Paraqitja e tij duhej të bëhej të premten, por u shty me kërkesë të avokatit mbrojtës, i cili kishte thënë se klienti i tij ishte në gjendje të rëndë psikike dhe fizike, pas arrestimit dhe transferimit të tij në Hagë.

Shefqet Kabashi, ish-pjesëtar i Ushtrisë Çlirimtare të Kosovës (UÇK) akuzohet për shpërfillje të Tribunalit të Hagës. Ai kishte refuzuar të dëshmonte në procesin gjyqësor ndaj ish-kryeministrit të Kosovës, Ramush Haradinaj dhe bashkëluftëtarëve të tij, Idriz Balaj e Lahi Brahimaj, me arsyetim se Tribunali nuk ofronte siguri të mjaftueshme për dëshmitarët. /Telegrafi