Vendorët e ndërkombëtarët fajtorë për krimin ekonomik

Të gjitha krimet ekonomike vendore janë në ‘martesë’ të ngushtë me bekimin edhe të ndërkombëtarëve, ka deklaruar të mërkurën lideri i Lidhjes Demokratike të Dardanisë, Nexhat Daci, gjatë një takimi me anëtarësinë dhe simpatizantët në Gjilan. Ai ka thënë se ekonomia e vendit edhe 10 vjet pas çlirimit, tri prej tyre në pavarësi, nuk ka arritur të ketë përkrahje të shtetit në formë të krijimit të një mjedisi relaksues, një shtet i cili do të kishte përparësi strategjike të zhvillimit ekonomik, e jo një shtet që nuk e din çka i duhet nesër.
Daci ka thënë se Anamorava ka shumë arsye që të pres më shumë nga periudha e ardhshme qeverisëse në Kosovë, ndërkohë që ka akuzuar qeverisjen e tanishme për dështime të mëdha dhe padrejtësi të shumta në të gjitha sferat. Ai ka thënë se atë që Kosova po e përjeton më së miri e ka paraqitur analiza e fundit e Gallupit se nuk jemi më populli më optimist që ishim për 10 vjet dhe kjo, sipas tij, është për shumë arsye.

“Pika numër një në strategjinë qeverisë të LDD-së do të jetë krijimin i një mjedisi për fillimin e zhvillimit të mirëfilltë dhe të qëndrueshëm ekonomik. dhe pjesa tjetër do të jetë e atillë që nuk do të ketë më karantinim të ekonomisë së Kosovës dhe getoizim të qytetarëve, por një politikë të qëndrueshme që do të luftojë me të gjitha mjetet ekonominë informale, krimin ekonomik dhe korrupsionin”, ka thënë Daci, njofton Koha.

Sipas tij, 40 për qind e ekonomizimit është ekonomi informale ose kriminale, e cila depërton përmes veriut, pa e paguar asnjë obligim ndaj shtetit, por, sipas tij, e keqja më e madhe e kësaj ekonomie kriminale është ngulfatja e bizneseve të shëndosha, e bizneseve normale. Daci tha se një numër i madh i bizneseve të shëndosha janë mbyllur pikërisht nga konkurrenca e sëmurë e ekonomisë informale që është e ndihmuar edhe nga politika ndërkombëtare, sepse, siç tha ai, nuk ka njeri në vend që nuk e sheh në veri se çfarë ngjanë me Kosovën.