Zgjedhjet të vëzhgohen nga ndërkombëtarët

Ushtruesi i detyrës së presidentit të Republikës së Kosovës, Jakup Krasniqi i ka dërguar një letër Përfaqësueses së Lartë të Bashkimit Evropian për Politikë të Jashtme, Catherine Ashton, përmes së cilës e njofton për zhvillimet e fundit në Kosovë.
Në letër, Krasniqi e njofton Ashton se zhvillimet politike në vendin tonë kanë sjellë nevojën që dita e zgjedhjeve të përgjithshme të caktohet më herët, pikërisht për datën 12 dhjetor 2010, një zhvillim ky që është në përputhshmëri të plotë me Kushtetutën e Republikës së Kosovës, por edhe në pajtueshmëri midis partive politike.

Ai gjithashtu i bën të ditur përfaqësues së lartë të BE-së për Politikë të Jashtme, se Komisioni Qendror Zgjedhor (KQZ) është i gatshëm t’i menaxhojë këto zgjedhje.

Në cilësinë e ushtruesit të detyrës së Presidentit të Republikës së Kosovës, Krasniqi përsërit ftesën Bashkimit Evropian për vëzhgim të tërë procesit të zgjedhjeve në vend.

“Vëzhgimi i zgjedhjeve nga BE do të dërgonte një mesazh të fuqishëm tek politikanët dhe qytetarët dhe do të ketë ndikim të madh në besueshmërinë dhe seriozitetin e këtyre zgjedhjeve”, thuhet në letër.

Ushtruesi i detyrës së presidentit të Republikës së Kosovës, Jakup Krasniqi u është drejtuar me një letër përmes ambasadorëve të gjitha vendeve të Bashkimit Evropian që kanë njohur pavarësinë e Kosovës si dhe ambasadës së SHBA-së dhe asaj të Zvicrës, duke i njoftuar për datën e re të mbajtjes së zgjedhjeve të përgjithshme, si dhe duke kërkuar prej tyre dërgimin e vëzhguesve për përcjelljen e procesit zgjedhor të 12 dhjetorit. /